Khaqan Khavar
har ek lamha hai mujh pe taari ḳhayal tera
main ik parinda muhit jis par hai jaal tera
bichhaḌ ke kunj apni Daar se bain kar rahi hai
juda hai tu ham se jaane kya hoga haal tera
ye ek Tahni hai mera maskan na chhin mujh se
hava-e-sarkash junub tera shumal tera
jo sabz patte the Dhaal teri vo jhaḌ ga.e hain
salib-shaḳhon pe jhulta hai zaval tera
lahu ki kirnon se shab ko chhalni kiya hai tu ne
rahega suraj ki tarah raushan kamal tera
Leave a Reply