Ahd-E-Hazir Ek Machine Aur Us Ka Karinda Hun Main

Anwar Sadeed

ahd-e-hazir ik machine aur us ka karinda huun main

reza reza ruuh meri hai magar zinda huun main

main huun vo lamha jo muTThi men sama sakta nahin

pal men huun imroz-o-mazi pal men a.inda huun main

vo jo mujh ko phenk aa.e bheḌiyon ke samne

kya gila-shikva ki un se aap sharminda huun main

mere lafzon men agar tab-o-tavana.i nahin

ai ḳhuda kyuun dahr men tera numa.inda huun main

main jo kahta huun samajhta hi nahin koi use

jaise malbe men dabi basti ka bashinda huun main

mere chehre par munaqqash is tarah tariḳh hai

jaise ik kohna aja.ib ghar ka bashinda huun main

ḳhaak huun lekin sarapa nuur hai mera vajud

is zamin par chand suraj ka numa.inda huun main

is jahan men main hi masjud-e-mala.ik tha ‘sadid’

is jahan men aaj ke insan se sharminda huun main