Shakeel Gwaliari
jab qafila yadon ka guzra to faza mahki
mahsus hua tere qadmon ki sada mahki
ḳhvabon men liye ham ne bose tire balon ke
jab hijr ki raton men savan ki ghaTa mahki
mangi jo dua ham ne us shoḳh se milne ki
loban ki ḳhushbu se baḌh kar vo dua mahki
ik narm se jhonke ki nazuk si shararat se
kya kya na hui rusva Daali jo zara mahki
divana huun ashiq huun avara huun mai-kash huun
ilzam ka.i aa.e jab laghzish-e-pa mahki
Leave a Reply