Jab Nazar jaan0b-E-Asbab-E-Fana Karte Hain

jab nazar jān0b-e-asbāb-e-fanā karte haiñ

pahle ham apnī taraf dekh liyā karte haiñ

jin ko hai tauq-o-salāsil ke taqāzoñ kā shu.ūr

vahī pābandi-e-ā.īn-e-vafā karte haiñ

kaash ham ko bhī batā deñ ye batāne vaale

choT lagtī hai koī dil pe to kyā karte haiñ

tarjumānī kā vasīla to haiñ dar-asl ye ashk

dil ke matlab ko ham āñkhoñ se adā karte haiñ

tohmat-e-ishq kahāñ aur kahāñ ye ma.asūm

muft badnām ‘munavār’ ko kiyā karte haiñ

Leave a Comment