jab kabhi un ki tavajjoh men kami paai gai
az-sar-e-nau dastan-e-shauq dohrai gai
bik gae jab tere lab phir tujh ko kya shikva agar
zindagani baada o saghar se bahlai gai
ai gham-e-duniya tujhe kya ilm tere vaste
kin bahanon se tabiat raah par laai gai
ham karen tark-e-vafa achchha chalo yuun hi sahi
aur agar tark-e-vafa se bhi na rusvai gai
kaise kaise chashm o aariz gard-e-gham se bujh gae
kaise kaise paikaron ki shan-e-zebai gai
dil ki dhadkan men tavazun aa chala hai khair ho
meri nazren bujh gaiin ya teri raanai gai
un ka gham un ka tasavvur un ke shikve ab kahan
ab to ye baten bhi ai dil ho gaiin aai gai
jurat-e-insan pe go tadib ke pahre rahe
fitrat-e-insan ko kab zanjir pahnai gai
arsa-e-hasti men ab tesha-zanon ka daur hai
rasm-e-changezi uthi tauqir-e-darai gai