Poet
jab josh-e-baharan tha un chandni raton men
har zarra gulistan tha un chandni raton men
jab apni adaon se ik zohra-jabin paikar
gharat-gar-e-iman tha un chandni raton men
jannat thi bahut dilkash shadab nazaron ki
har lamha rag-e-jan tha un chandni raton men
jab sarv ki saf ka vo mehrab-numa saaya
tasvir-e-shabistan tha un chandni raton men
jab phuul sa vo chehra us jan-e-baharan ka
taqdis ka unvan tha un chandni raton men
jab vaqt damakti si shaḳhon pe sanobar ki
ik dida-e-hairan tha un chandni raton men
bhigi hui ankhon ka mauhum ishara bhi
ik ḳhuld-badaman tha un chandni raton men
e.ajaz-e-mohabbat tha allah ki rahmat thi
qismat pe main nazan tha un chandni raton men
muddat se nahin dekha us husn-e-gulabi ko
sha.ir ka jo mehman tha un chandni raton men
Leave a Reply