jab chandniyan ghar ki dahliz pe chalti hain
aseb-zada ruhen saḌkon pe Tahalti hain
dar-asl vo ninden hain aghosh men ashkon ki
palkon ki munDeron se har shab jo phisalti hain
ma.asum umiden hain halat ki gardish men
ghar men kisi muflis ke shahzadiyan palti hain
ai kaash ki raushan hon fanus umidon ke
ankhon ke kaToron men kuchh sham.en pighalti hain
ḳhud se hi na ho ja.un anjan kisi din main
har roz tamanna.en poshak badalti hain
masla gaya jis din se kaliyon ko yahan ‘mina’
kuchh ḳhushbuen sahra se har raat nikalti hain
Leave a Reply