Abid Wadood
jab bhi tanhai kabhi hoti hai hasil mujh ko
vaqt rakh deta hai mere hi muqabil mujh ko
akhiri umr ki uftad gai taba ki khair
raas aata hai alam-zar na mahfil mujh ko
ek baar aur main ji paun to shayad hal hon
zindagani ne diye aise masail mujh ko
ishq itna bhi hai kaafi ki tujhe chahta huun
itna hasil hai to kya kuchh nahin hasil mujh ko
jab bahar aai tavanai bhi vapas aai
qaid men rakh na sake band-o-salasil mujh ko
itni unchai se to meri zabun-hali dekh
jitni duuri se nazar aata hai sahil mujh ko
mujh ko maazur banati hai miri kam-yabi
nazar aata hai kharidar na saail mujh ko
main tire lutf se nadim huun magar arz hai ye
ab samundar se banana nahin sahil mujh ko
main ne kashkol jo hathon men liya to ‘abid’
saari duniya nazar aane lagi saail mujh ko
Leave a Reply