bujhti hui sham.en hoti hain Duube hue taare hote hain
mahfil ke ujaḌne se pahle asar ye saare hote hain
barbad-e-mohabbat par aisa ik daur bhi aa hi jaata hai
aghosh men suraj hota hai palkon pe sitare hote hain
ye zarf hai zarf-e-fikr-o-nazar har Dubne vaala kya jaane
be-bahr bhi tufan uThte hain be-mauj bhi dhare hote hain
nazzara to hai be-parda magar har dekhne vaala kya dekhe
jo zarf-e-nazar men aa na saken aise bhi nazare hote hain
tughyan-e-havadis ki hamdam itni hi navazish kya kam hai
kashti na sahi sahil na sahi tufan to hamare hote hain
Leave a Reply