Altaf Mashhadi
dil-o-jigar ko mire dagh-dar rahne de
kisi ki siine men hai yadgar rahne de
labon pe mauj-e-tabassum ho aankh men aansu
ḳhizan men partav-e-rang-e-bahar rahne de
shikast-e-lazzat-e-girya hai karb-e-ruhani
main ashk-bar bhala ashk-bar rahne de
nahin nahin mujhe rahat ki aarzu hi nahin
isi tarah se mujhe be-qarar rahne de
na mauj-e-ashk hasinan pe bhuul ai ‘altaf’
na DhunD in men dur-e-shahvar rahne de
Leave a Reply