Dar Pe Us Shokh Ke Jab Ja Baitha

dar pe us shokh ke jab ja baitha

yaar sab kahte hain achchha baitha

khubi-e-qismat-e-qasid dekho

paas us shokh ke kya ja baitha

hai habab-e-lab-e-dariya insan

jab zara sar ko uthaya baitha

zoaf-e-piri se bana naqsh-e-qadam

main vahin ka hua jis ja baitha

surat-e-bad raha sar-gardan

khaak ki tarah main uttha baitha

paanv phule jo tire kuche men

kaat ke dast-e-tamanna baitha

bahr-e-hasti men hababon ki tarah

saikdon baar main uttha baitha

kab se tera falak-e-shoabada-baz

dekhta huun main tamasha baitha

samne kis ke jhukaya sar ko

kis liye shaikh tu uttha baitha

na to naala hai na afghan ai dil

kis liye chup hai akela baitha

khvab-e-sair-e-chaman-e-alam hai

kya dil-e-zar hai phula baitha

daman-e-dil pe laga dagh-e-junun

mulk par ishq ka sikka baitha

naqd-e-dil tha jo bizaat men miri

ishq men us ko bhi kho-kha baitha

jo gaya mulk-e-adam kaun gaya

us ke kuche men jo baitha baitha

dil ko hai jazba-e-ulfat shayad

bak raha hai jo akela baitha

chal base ‘muntahi’ sab yaar tire

tu yahan karta hai ab kya baitha

Leave a Comment