jab ba-faizan-e-junun parcham-e-zar khulte hain
qufl-e-shab toḌ ke anvar-e-sahar khulte hain
yuun ubharti hai dil-e-tar men ummid ki zau
jaise zindan ke kabhi rauzan-o-dar khulte hain
gham se milta hai miri fikr ko is tarah faragh
jis tarah ta.ir-e-par-basta ke par khulte hain
abr barse to bayaban men mahakti hai bahar
laakh mai-ḳhane sar-e-rahguzar khulte hain
jin ko afza.ish-e-mantiq ne kiya ho taḳhliq
aise uqde bhi kahin ahl-e-nazar khulte hain
shaiḳh ji arsa-e-jalvat men hain paband-e-rusum
par ye ḳhalvat men bahut sho.abda-gar khulte hain
fahm-o-iblagh koi khel nahin hai ‘aḳhtar’
ḳhun-e-dil dene se asrar-e-hunar khulte hain
Leave a Reply