jab achanak mire pahlu se mira yaar uTha
dard siine men uTha aur ka.i baar uTha
zindagi bojh na ban jaa.e tan-asani se
apne raste men kabhi ḳhud koi divar uTha
sarsar-e-vaqt se ghafil tha tu ai kibr-nazad
gir ga.i ḳhaak zamin par tiri dastar uTha
vahm-e-nazara men hai afiyat-e-dida-o-dil
bhuul kar bhi na kabhi parda-e-asrar uTha
jis se ho jaa.en mire chahne vaale taqsim
aisi divar na koi mire me.amar uTha
ḳhauf-e-tadib se mazlumon pe roya na gaya
sham-e-maqtal men koi bhi na azadar uTha
duur tak phaila hua dasht-e-bala hai bahar
apni mahfil se na mujh ko mire dildar uTha
naz-bardar-e-hunar ho ga.e ruḳhsat kab ke
ab bisat-e-suḳhan-o-naghma-o-ash.ar uTha
samne tere zar-afshan hai na.i sub.h-e-umid
apni palkon ko zara dida-e-ḳhun-bar uTha
kal ‘farasat’ tha yahan majma-e-yaran tire saath
ab isi shahr men tanha.i ke azar uTha
Leave a Reply