Yusuf Taqi
jaane kitni der chalegi saath mire chamkili dhuup
aane vaala mausam laa.e shayad giili giili dhuup
qarya qarya kaanp raha hai sard hava ke jhonkon se
kitne angan garma.egi tanha ek akeli dhuup
chanchal shoḳh-ada kirnen to duur disha tak ja pahunchin
baiThi ḳhud ko kos rahi hai angan ki sharmili dhuup
azmat ki mustahkam choTi shayad us ko raas na aa.i
har chaukhaT ko chhune nikli shohrat ki rangili dhuup
ham ne apni hirs-o-havas ko baḳhshi itni tabani
ab ki sadi men shayad phaile basti men zahrili dhuup
Leave a Reply