jaan ḳhud-shanas ho to dua men asar bhi hai
main jal raha huun tujh ko miri kuchh ḳhabar bhi hai
shahr-e-gulab men bhi koi DhunDhta raha
vo dhuup jis men tere badan ka shajar bhi hai
vo aks huun ki mujh men tire ḳhal-o-ḳhad nahin
tu mera aa.ina bhi hai a.ina-gar bhi hai
sochon to zar-nigar se chehre bhi saath hain
dekhun to ye safar mira tanha safar bhi hai
main bhi huun zaḳhm zaḳhm tire intizar men
ik shaam rahguzar mira viran ghar bhi hai
kya hai jo kam-nazar mujhe pahchante nahin
chehra bhi hai mira mire shanon pe sar bhi hai
ḳhushbu ke pairahan se ujale ke jism tak
main huun to phir saliqa-e-arz-e-hunar bhi hai
Leave a Reply