be-nam sa.aton ka safar ḳhatm ho chala
lo imtihan-e-fikr-o-nazar ḳhatm ho chala
vaan tirgi-e-mahfil-e-yaran na miT saki
yaan roghan-e-charagh-e-hunar ḳhatm ho chala
ehsan hai mashiyyat-e-parvardigar ka
hangama-e-hayat-e-bashar ḳhatm ho chala
mai-ḳhana-e-hayat se rindo nikal chalo
paimana-e-dua ka asar ḳhatm ho chala
ai jan-e-intizar naya zaḳhm de mujhe
lutf-e-bahar-e-dida-e-tar ḳhatm ho chala
dikhla ke aftab-e-daraḳhshan ki ik jhalak
afsana-e-numud-e-sahar ḳhatm ho chala
us ne ik aur dagh-e-jigar de diya ‘saba’
jab e’tibar-e-soz-e-jigar ḳhatm ho chala
Leave a Reply