ja ke pachhta.enge na ja ke bhi pachhta.iyega
aap jaate hain vahan achchha chale ja.iyega
main ka.i din hue ḳhud se hi jhagaḌ baiTha huun
aap fursat se kisi din mujhe samjha.iyega
main ḳhayalon men bhaTak jaata huun baiThe baiThe
bhej aahaT ka sandesa mujhe bulva.iyega
main ne zulmat men guzare hain ka.i qarn so aap
raushni se jo main Dar ja.un na ghabra.iyega
main samajhta huun mujhe log samajhte hi nahin
main kisi roz na samjhun to samajh ja.iyega
gaah ho jaata huun main apni ana ka qaidi
main na aa.uun to phir aa kar mujhe chhuḌva.ega
ḳhair-maqdam ko hai tayyar jahan ja.iye aap
haan palaTna ho to phir mere hi ho ja.iyega
mujh se zid hai to phir us zid ko nibhane ke liye
main jo mar ja.un to phir aap bhi mar ja.iyega
jam-e-jam fikr ka rakhta hai nirale manzar
aap jo dekhte hain duniya ko dikhla.iyega
soch jab yaksan na ho qafila kis kaam ka hai
aap ‘ahmad’ kahin raste men hi rah ja.iyega
Leave a Reply