jab bhi siine men kisi but ko sajaya ham ne
ik hijab aap ke chehre se uThaya ham ne
naam lene se tira baaz na aaya phir bhi
dil-ekambaḳht ko samjhaya bujhaya ham ne
teri tasvir pe kuchh soch ke aksar apna
naam likh likh ke ka.i baar miTaya ham ne
ek ehsas ki bandish ke siva kuchh bhi nahin
aap ke pyaar se is raaz ko paaya ham ne
kabhi is dil ke varaq par jo likhi thi tahrir
tera ḳhat paḌh ke use aaj miTaya ham ne
aaj kis darja bulandi pe hai qismat apni
aap ki bazm men dil apna jalaya ham ne
‘raje’ ham kis se kahen kaun sunega fariyad
is jahan men koi insan na paaya ham ne
Leave a Reply