Poet
phir koi ḳhalish nazd-e-rag-e-jan to nahin hai
phir dil men vahi nashtar-e-mizhgan to nahin hai
kyuun shaam se Duube se ho ummid ke taaro
abadi-e-dil-e-shahr-e-ḳhamoshan to nahin hai
kyuun hai dil-e-vahshat-zada bezar gulon se
ta-hadd-e-nazar rah-e-bayaban to nahin hai
kyuun uThne lage aaj qadam janib-e-sahra
phir josh-e-junun silsila-e-jumba to nahin hai
ai dost rah-e-zist bhi hai tira-o-pur-ḳham
lekin ye tiri kakul-e-pechan to nahin hai
har choT ka hasil hain bilakte hue aansu
ye dard ye gham qismat-e-insan to nahin hai
ai kaash koi mauj mujhe itna bata de
sahil pe bhi ye shorish-e-tufan to nahin hai
har shai men tire husn ki zau dekh raha huun
haan mujh ko tiri zaat ka irfan to nahin hai
phulon ki tarah hansne lage zaḳhm hazaron
dil bhi kahin majruh-e-baharan to nahin hai
lahrane lage kyuun miri palkon men hasin ḳhvab
ye saya-e-gesu-e-pareshan to nahin hai
ye rang ye ḳhushbu ye tabassum ye shua.en
ye anjuman-e-zohra-jabinan to nahin hai
ai dost main jiita huun tire gham ke sahare
aghyar ka mujh par koi ehsan to nahin hai
yuun dil hai har ik ranj-o-alam ka mutahammil
lekin gham-e-dauran gham-e-janan to nahin hai
ye naaz ye andaz ye shoḳhi ye ada.en
ai dil ye kahin bazm-e-hasinan to nahin hai
ye chaal ye ankhen ye nazar dekhna ‘muztar’
ye shoḳh vahi rashk-e-ghazalan to nahin hai
Leave a Reply