Phir Koi KHalish Nazd-E-Rag-E-Jaan to Nahin Hai

phir koī ḳhalish nazd-e-rag-e-jāñ to nahīñ hai

phir dil meñ vahī nashtar-e-mizhgāñ to nahīñ hai

kyuuñ shaam se Duube se ho ummīd ke taaro

ābādī-e-dil-e-shahr-e-ḳhamoshāñ to nahīñ hai

kyuuñ hai dil-e-vahshat-zada bezār guloñ se

tā-hadd-e-nazar rāh-e-bayābāñ to nahīñ hai

kyuuñ uThne lage aaj qadam jānib-e-sahrā

phir josh-e-junūñ silsila-e-jumbā to nahīñ hai

ai dost rah-e-zīst bhī hai tīra-o-pur-ḳham

lekin ye tirī kākul-e-pechāñ to nahīñ hai

har choT kā hāsil haiñ bilakte hue aañsū

ye dard ye ġham qismat-e-insāñ to nahīñ hai

ai kaash koī mauj mujhe itnā batā de

sāhil pe bhī ye shorish-e-tūfāñ to nahīñ hai

har shai meñ tire husn kī zau dekh rahā huuñ

haañ mujh ko tirī zaat kā irfāñ to nahīñ hai

phūloñ kī tarah hañsne lage zaḳhm hazāroñ

dil bhī kahīñ majrūh-e-bahārāñ to nahīñ hai

lahrāne lage kyuuñ mirī palkoñ meñ hasīñ ḳhvāb

ye sāya-e-gesū-e-pareshāñ to nahīñ hai

ye rañg ye ḳhushbū ye tabassum ye shuā.eñ

ye anjuman-e-zohra-jabīnāñ to nahīñ hai

ai dost maiñ jiitā huuñ tire ġham ke sahāre

aġhyār kā mujh par koī ehsāñ to nahīñ hai

yuuñ dil hai har ik rañj-o-alam kā mutahammil

lekin ġham-e-daurāñ ġham-e-jānāñ to nahīñ hai

ye naaz ye andāz ye shoḳhī ye adā.eñ

ai dil ye kahīñ bazm-e-hasīnāñ to nahīñ hai

ye chaal ye āñkheñ ye nazar dekhnā ‘muztar’

ye shoḳh vahī rashk-e-ġhazālāñ to nahīñ hai

Leave a Comment