ishq men majnun-o-farhad nahin hone ke
ye na.e log hain barbad nahin hone ke
ye jo da.ave hain mohabbat ke abhi hain janan
aur do-char baras baad nahin hone ke
kya kaha toḌ ke laoge falak se taare
dekho in baton se ham shaad nahin hone ke
naqsh hain dil pe mire ab bhi tumhare va.ade
ḳhair chhoḌo vo tumhen yaad nahin hone ke
ghar liye phirti huun har vaqt tumhare pichhe
tum magar vo ho ki abad nahin hone ke
man.a hai rasm-o-rivajon se baghavat karna
ye sabaq mujh ko magar yaad nahin hone ke
ham ne ḳhud pahni hai ‘nusrat’ ye vafa ki zanjir
ham to ḳhud hi kabhi azad nahin hone ke
Leave a Reply