ishq men hua un ke dushman ik jahan apna
dard-e-dil karen kis se ja kar ab bayan apna
rakhte hain zaban lekin baat kar nahin sakte
haal bazm men us ki ab hai sham.a saan apna
haif to ye aata hai chal diye dam-e-bismil
ye bhi to na samjhe vo hai ye nim-jan apna
dekhen ham nahin hota kis tarah asar un ko
gosh-zad ho gar un ke nala-o-fughan apna
thi yahi ḳhushi un ki is liye suna ham ne
jan-o-dil kiya kaise vaqf-e-imtihan apna
mahvashon ke bin dekhe dil hai apna sad-para
chaak kya dikhavega aa ke yaan katan apna
kaam kya hai naseh ko kyuun vo aaya samjhane
de diya jise chaha dil tha haan ji haan apna
rashk-e-bagh-e-jannat hai vo gali jahan ke ham
yaar rahne vaale hain dil lage kahan apna
ek dam men denge ham bas dhuen bikher us ke
ho gaya to hone do dushman asman apna
bhuul jaa.e sab simab be-qarariyan apni
dekhe ḳhvab men bhi gar ye dil-e-tapan apna
‘aish’ us jafa-ju se kahiye ai sitam-pesha
ta-kuja koi rakkhe dard-e-dil nihan apna
Leave a Reply