ishq ko tark-e-junun se kya gharaz
charḳh-e-gardan ko sukun se kya gharaz
dil men hai ai ḳhizr gar sidaq-e-talab
rah-rau ko rah-numon se kya gharaz
hajiyo hai ham ko ghar vaale se kaam
ghar ke mehrab o sutun se kya gharaz
gunguna kar aap ro paḌte hain jo
un ko chang o arghanun se kya gharaz
nek kahna nek jis ko dekhna
ham ko taftish-e-darun se kya gharaz
dost hain jab zaḳhm-e-dil se be-ḳhabar
un ko apne ashk-e-ḳhun se kya gharaz
ishq se hai mujtanib zahid abas
sher ko said-e-zabun se kya gharaz
kar chuka jab shaiḳh tasḳhir-e-qulub
ab use duniya-e-dun se kya gharaz
aa.e ho ‘hali’ pa.e-taslim yaan
aap ko chun-o-chagun se kya gharaz
Leave a Reply