ishq ko aankh men jalte dekha
phuul ko aag men khilte dekha
ishq ke raaz na puchho sahab
ishq ko daar pe chadhte dekha
ishq ke daam bhi lag jaate hain
misr men us ko bikte dekha
ishq hai vajib us ko ham ne
jism aur jaan men utarte dekha
us ko havas ka naam na dena
lauh pe us ko likhte dekha
arsh bhi hairat se takta tha
dasht men us ko palte dekha
ishq anokha manzar jis men
raaz ko khvab men Dhalte dekha
hijr ka zakhm to zakhm hai aisa
bakhiya-garon se bhi khulte dekha
ishq vo baagh hai jis ko ham ne
hijr ki rut men mahakte dekha
gham kya hijr aur visal ka us ko
ishq men jis ko bhatakte dekha