Zaheer Kashmiri
ishq ik hikayat hai sarfarosh duniya ki
hijr ik masafat hai be-nigar sahra ki
un ke ru-ba-ru nikle nutq o lafz be-ma.ani
baat hi ajab lekin ḳhamushi ne paida ki
vaqt ke tasalsul men ham ba-rang-e-sho.ala the
umr-e-yak-nafas men bhi raushni the duniya ki
ham ko sahal-angari gharq kar chuki hoti
himmat-afrin nikli lahar lahar dariya ki
yuun to vo farokash the jada-e-rag-e-jan men
mavara-e-imkan thi raushni kaf-e-pa ki
sham-e-mahfil-e-yak-shab aur tul-e-fikr itna
kaun shaḳhs tha jis ne arzu-e-farda ki
ham bhi hain niko-surat ham bhi nek-sirat hain
ham ne bandagi ki hai ik jamal-e-ra.ana ki
Leave a Reply