shukr hai aap aa ga.e aaj ka din to Tal gaya
thoḌi si baat ho ga.i thoḌa sa dil bahal gaya
chashm-ba-chashm guftugu shahr-ba-shahr ku-ba-ku
sina-ba-sina raz-e-dil duur talak nikal gaya
sho.ala numu-pazir tha us ki rida-e-sard men
shoḳh hava thi be-ḳhabar barf se haath jal gaya
shor hai be-dili ka shor dhyan se meri baat sun
tera ḳhayal-e-dil-sitan dil se mire nikal gaya
saa.e jhulas ke rah ga.e vaqt ki tez dhuup men
mera bhi rang uḌ gaya tera bhi ruup Dhal gaya
vaise to kuchh nahin hua dekh ke us ki ik jhalak
paanv se khinch ga.i zamin haath se dil phisal gaya
charagaron ke darmiyan us ki kami rahi magar
sham-e-firaq-e-yar ka yaad se kaam chal gaya
jaadu tiri nigah ka aaj na mujh pe chal saka
aaj tira ḳhayal bhi kaise kahun ki khal gaya
Leave a Reply