Ishq-E-Dahan Mein Guzri Hai Kya Kuchh Na Puchhiye

ishq-e-dahan men guzri hai kya kuchh na puchhiye

naguftani hai haal mira kuchh na puchhiye

kya dard-e-ishq ka hai maza kuchh na puchhiye

kahta hai dil kisi se dava kuchh na puchhiye

mahshar ke daghdaghe ka main ahval kya kahun

hangama jo hua so hua kuchh na puchhiye

jab puchhiye to puchhiye kya guzri ishq men

ham se to aur us ke siva kuchh na puchhiye

kya kya ye sabz baagh dikhati hai nazaa men

dam de rahi hai jo jo qaza kuchh na puchhiye

puchha jo ham ne gor-e-ghariban ka ja ke haal

aai ye turbaton se sada kuchh na puchhiye

qismat se paiye jo kabhi us ko khush-mizaj

kya kuchh na kahiye yaar se kya kuchh na puchhiye

ragdi hain ediyan to hui hai ye mustajab

kis ajizi se ki hai dua kuchh na puchhiye

chhoda jo murda jaan ke sayyad ne mujhe

kyunkar uda main ho ke riha kuchh na puchhiye

tarsa kiya main daulat-e-didar ke liye

qismat ne jo suluk kiya kuchh na puchhiye

ulfat ka naam le ke nazar-band ho gae

paai jo pyaar kar ke saza kuchh na puchhiye

kya sarguzisht gor-e-ghariban ki main kahun

ahval-e-bandagan-e-khuda kuchh na puchhiye

khushbu ne aap ki jo sar-afraz use kiya

kis naaz se chali hai saba kuchh na puchhiye

puchha ‘sharaf’ ke marne ka un se jo vaqia

ankhon men ashk bhar ke kaha kuchh na puchhiye

Leave a Comment