Ravish Siddiqi
ishq dushvar nahin ḳhush-nazari mushkil hai
sahl hai koh-kani shishagari mushkil hai
us men shamil hai mira husn-e-talab bhi ai dost
varna is husn se bedad-gari mushkil hai
lag ga.i daman-e-gesu-e-pareshan ki hava
hosh men aa.e nasim-e-sahari mushkil hai
masnad-e-lala-o-raihan ho ki ho taḳhta-e-dar
ham-nashin chara-e-ashufta-sari mushkil hai
ye haqiqat koi arbab-e-ḳhabar se puchhe
kis qadar marhala-e-be-ḳhabari mushkil hai
dil-e-bedar ka ab aur hi aalam hai ‘ravish’
lab tak aa jaa.e fughan-e-sahari mushkil hai
Leave a Reply