ishq aur ishq-e-shoala-var ki aag
aag aur ulfat-e-bashar ki aag
jis ko kahte hain barq-e-alam-soz
hai vo kafir tiri nazar ki aag
hae-re teri garmi-e-raftar
khaak tak bhi hai rahguzar ki aag
lo shab-e-vasl bhi tamam hui
asman ko lagi sahar ki aag
ishq kya shai hai husn hai kya chiiz
kuchh idhar ki hai kuchh udhar ki aag
tur-e-sina bana diya dil ko
uf-re kafir tiri nazar ki aag
haqq-taala bachae is se ‘zahir’
qahr hai ulfat-e-bashar ki aag
Leave a Reply