Nazm Tabatabai
is vaste adam ki manzil ko DhunDte hain
muddat se doston ki mahfil ko DhunDte hain
ye dil ke paar ho kar phir dil ko DhunDte hain
tir-e-nigah us ke bismil ko DhunDte hain
ik lahr men na the ham kyuun ai habab dekha
yuun aankh band kar ke sahil ko DhunDte hain
tarz-e-karam ki shahid hain meva-dar shaḳhen
is tarah sar jhuka kar saa.il ko DhunDte hain
hai vasl o hijr apna ai qais turfa-mazmun
mahmil men baiThe hain aur mahmil ko DhunDte hain
tul-e-amal ka rasta mumkin nahin ki tai ho
manzil pe bhi pahunch kar manzil ko DhunDte hain
hasrat shabab ki hai ayyam-e-sheb men bhi
ma.adum ki havas hai zaa.il ko DhunDte hain
uThte hain valvale kuchh har baar dard ban kar
kya janiye jigar ko ya dil ko DhunDte hain
zaḳhm-e-jigar ka mere hai rashk doston ko
marta huun main ki ye kyuun qatil ko DhunDte hain
ahl-e-havas ki kashti yak baam o do hava hai
dariya-e-ishq men bhi sahil ko DhunDte hain
aaya jo rahm mujh par is men bhi chaal hai kuchh
siine pe haath rakh kar ab dil ko DhunDte hain
karte hain kar-e-farhad asan zamin men bhi
mushkil-pasand hain ham mushkil ko DhunDte hain
ai ḳhizr pai-e-ḳhajista bahr-e-ḳhuda karam kar
bhaTke hue musafir manzil ko DhunDte hain
dil-ḳhvah tere ishve dil-ju tire ishare
vo dil TaTolte hain ye dil ko DhunDte hain
ai ‘nazm’ kya bata.en hajj-o-tavaf apna
ka.abe men bhi kisi ki mahmil ko DhunDte hain
Leave a Reply