Mansoor Usmani
is shahr men chalti hai hava aur tarah ki
jurm aur tarah ke hain saza aur tarah ki
is baar to paimana uThaya bhi nahin tha
is baar thi rindon ki ḳhata aur tarah ki
ham ankhon men aansu nahin laate hain ki ham ne
paa.i hai virasat men ada aur tarah ki
is baat pe naraz tha saaqi ki sar-e-bazm
kyuun aa.i piyalon se sada aur tarah ki
is daur men mafhum-e-mohabbat hai tijarat
is daur men hoti hai vafa aur tarah ki
shabnam ki jagah aag ki barish ho magar ham
‘mansur’ na mangenge dua aur tarah ki
Leave a Reply