is qadar afsurdagi mahsus ki
main ne jab us ki kami mahsus ki
raat men soya tha dariya ke qarib
ḳhvab men ik jal-pari mahsus ki
us ke aane ka yaqin baḌhne laga
farsh-e-dil par ghaas ugi mahsus ki
aaj phir vo dar khula tha dhyan men
aur ik divar si mahsus ki
vaqt ka karne lage ham ehtiram
har mohabbat aḳhiri mahsus ki
maut jis din chhu ke guzri thi mujhe
main ne us din zindagi mahsus ki
aaj maan ghar pe nahin thi aur phir
ham ne kitni be-ghari mahsus ki
vaqt us ne mujh se puchha tha ‘vasim’
sab ne hathon men ghaḌi mahsus ki
Leave a Reply