is kar-e-gah-e-rang men ham tang nahin kya
jo sar pe laga hai abhi vo sang nahin kya
tasvir ko tasvir dikha.i nahin jaati
is a.ina-ḳhane men nazar dang nahin kya
hai halqa-e-jan apni vafaon ka tasavvur
is daagh se aage koi farsang nahin kya
har baat pe ham dete hain ghairon ka havala
apna koi ahang koi rang nahin kya
baḳhshe hue ik ghunT pe ham jhuum rahe hain
ab maang ke piina bhi koi nang nahin kya
zaḳhm-e-dil-e-betab hai hathon men nivala
is baat pe duniya se miri jang nahin kya
vo rang nahin sho.ala-e-ehsas men ‘baqi’
ham saz-e-tamanna se ham-ahang nahin kya
Leave a Reply