Ishaq Athar Siddiqui
is hujum-e-be-aman men koi apna bhi to ho
main gale kis ko laga.un koi zinda bhi to ho
barg-e-avara hava na-ashna be-mehr phuul
aate jaate mausamon men koi Thahra bhi to ho
sab gharon men lazzat-e-asudgi hai ḳhema-zan
main sada kya duun yahan par koi sunta bhi to ho
phir se shaḳh-e-dar par khilne lagen laale ke phuul
phir se duniya jaag uTThe koi aisa bhi to ho
TuuT jaata aap hi be-dard sannaTe ka zor
ḳhauf se bahar nikal kar koi bola bhi to ho
main ne us ko dil-navaz-o-ḳhush-ada kya kya kaha
meri is zinda-dili ko koi samjha bhi to ho
main bhi kah deta ye mere ḳhvab ki ta.abir hai
teri ta.abiron men mera ḳhvab bola bhi to ho
Leave a Reply