ek lahrati hui naddi ka sahil hua main
phir hua ye ki har ik lahr se gha.el hua main
ab banate hain mire dost nishana mujh ko
tujh ko paane ki talab men kisi qabil hua main
dil men is raaz ko ta-umr chhupa kar rakkha
kis ki chahat men tha shamil kise hasil hua main
aa gaya ishq ka mafhum samajh men us ki
us ke ḳhvabon men kisi roz jo daḳhil hua main
tu suḳhan-var hai to mujh ko bhi ye hasil hai sharaf
lafz ban kar tire divan men shamil hua main
ek muddat se samajhne men laga huun ḳhud ko
ya.ani ab apne liye bhi baḌa mushkil hua main
Leave a Reply