ghairon se bhi dhoke khaa.e hain apnon se bhi dhoke khaa.e hain
tab ja ke kahin is duniya ke andaz samajh men aa.e hain
vo apni jafa-e-paiham par dam bhar bhi agar sharma.e hain
ehsas-e-vafadari ko mire pahron pachhtave aa.e hain
ham men na mohabbat ki garmi ham men na sharafat ki narmi
insan kahen kyon sab ham ko ham chalte phirte saa.e hain
kuchh phuul gulon ke haar bane kuchh jins sar-e-bazar bane
in phulon ki qismat kya kahiye shaḳhon hi pe jo murjha.e hain
sahra-e-ḳhirad men hairan hain kal qafila-ha-e-rahravan
munh moḌ liya hai suraj ne har samt andhere chha.e hain
ehsan ba-har-halat ham par hai un ki badalti nazron ka
jiine ke sahare ulfat men kuchh kho.e hain kuchh paa.e hain
ummid ne phir karvaT li hai badle hain faza ke phir tevar
ab dekhiye kya barsate hain kuchh badal ghir kar aa.e hain
ham dost nahin dushman hi sahi bhaa.i na sahi beri hi sahi
hamsa.e ka haq to do ham ko ham kuchh bhi na ho hamsa.e hain
vo qadr karen ya Thukra den ye ahl-e-nazar ki marzi hai
ambar se ḳhar-o-ḳhas ki ‘raza’ kuchh moti chun kar laa.e hain
Leave a Reply