is dil se mire ishq ke arman ko nikalo
tahrir se auraq-e-pareshan ko nikalo
mumkin hai tahi kar do mujhe har kisi shai se
mumkin ho agar dil se is iman ko nikalo
gar duur talak baab ke imkan nahin hain
divar men ik rauzan-e-zindan ko nikalo
jis ko hai bharam aaj bhi paiman-e-vafa ka
siine se mire us dil-e-nadan ko nikalo
patjhaḌ men bhi har gul pe bahar aa.e yaqinan
gulshan se agar mausam-e-hijran ko nikalo
tab ja ke laga paoge dil apna ḳhizan se
pahle to is ummid-e-baharan ko nikalo
tanha.i chali aa.e khula jaan ke ik dar
palkon se agar yaad ke darban ko nikalo
sahraon men phir duur talak saaf hai manzar
ankhon se agar ret ke tufan ko nikalo
ashufta-saron par bhi nazar ja.egi ‘nayab’
gardan se agar sar-ba-gareban ko nikalo
Leave a Reply