is alam-e-hairat-o-ibrat men kuchh bhi to sarab nahin hota
koi niind misal nahin banti koi lamha khvab nahin hota
ik umr numu ki khvahish men mausam ke jabr sahe to khula
har khushbu aam nahin hoti har phuul gulab nahin hota
is lamha-e-khair-o-shar men kahin ik saaat aisi hai jis men
har baat gunah nahin hoti sab kar-e-savab nahin hota
mire chaar taraf avazen aur divaren phail gaiin lekin
kab teri yaad nahin aati aur ji be-tab nahin hota
yahan manzar se pas-e-manzar tak hairani hi hairani hai
kabhi asl ka bhed nahin khulta kabhi sachcha khvab nahin hota
kabhi ishq karo aur phir dekho is aag men jalte rahne se
kabhi dil par aanch nahin aati kabhi rang kharab nahin hota
miri baten jivan sapnon ki mire sher amanat naslon ki
main shaah ke giit nahin gaata mujh se adab nahin hota