iltifat-e-am hai vaj.h-e-pareshani mujhe
kis qadar mahngi paḌi hai un ki arzani mujhe
bahr-e-hasti hai miri nazron men ik dasht-e-sarab
ret ka hota hai dhoka dekh kar paani mujhe
tere jalvon ka to har ik zarra hai a.ina-dar
mane-e-nazzara hai ḳhud meri hairani mujhe
sa.i-e-be-hasil thi dil ki koshish-e-iḳhfa-e-raz
kar ga.i rusva nigahon ki pareshani mujhe
ya adu-e-bul-havas ki naz-bardari karo
ya bana lo taḳhta-e-mashq-e-sitam-rani mujhe
khul nahin sakti faqat ik aap ke dil ki girah
varna kya kya gutthiyan aati hain suljhani mujhe
kis qadar na-paid hain ahl-e-kamal ab ai ‘vafa’
koi apna bhi nazar aata nahin saani mujhe
Leave a Reply