Ahmad Azeem
husn-pari ho saath aur be-mausam ki barish ho jaae
chhatri kaun kharidega phir jitni barish ho jaae
aisi pyaas ki shiddat hai ki main ye duaen karta huun
jitne samundar hain duniya men sab ki barish ho jaae
meri ghazlen us ke saath bitae vaqt ka hasil hain
vaisi faslen ug aati hain jaisi barish ho jaae
chhote chhote talabon se paani chhina jaata hai
tum to bas ye kah dete ho thodi barish ho jaae
andhi aae bijli kadke kaali ghataen chhane lagen
majburan vo ruke mire ghar itni barish ho jaae
tang aaya huun main is hijr-o-vasl ki bunda-bandi se
ya to sukha pad jaae ya dhang ki barish ho jaae
Leave a Reply