husn men naz-o-ada ishq men vahshat kaisi
is zamane men vafa kaisi mohabbat kaisi
talḳh baton pe ḳhamoshi bhi baḌa azm hai par
galiyan sun ke dua de vo sharafat kaisi
log ghalichon pe sajde se bhi katrate hain
tegh ke saa.e men karte the ibadat kaisi
ahd-e-ḳhush-hali ka matlab hi liya ayyashi
ab agar TuuT ga.e ho to shikayat kaisi
koi bola hai ki shadan hai kisi ka ho kar
ho mujhe ranj vo ḳhush hai to mohabbat kaisi
umr bhar tifl-e-tabi.at ko shararat sujhi
vaqt-e-aḳhir ye jagi ḳhvahish-e-jannat kaisi
maskan-e-amn-o-aman tha ye vatan ‘nazr’ mira
aaj barpa hai har ik samt qayamat kaisi
Leave a Reply