husn ḳhud ban gaya tamasha.i
marhaba ai junun-e-rusva.i
husn ne li azal men angḌa.i
ishq ne choT ruuh par khaa.i
jo tiri raah men hui pamal
haa.e us zindagi ki ra.ana.i
jalve ḳhud un ke ban ga.e parde
qurbat-e-husn bhi na raas aa.i
ab-o-gil se yahan kise matlab
justuju ki hai kar-farma.i
husn hi husn jalva hi jalva
kaisi duuri kahan ki tanha.i
har-nafas ik payam hai un ka
har-qadam par hai himmat-afza.i
ru-ba-ru un ke dam-ba-ḳhud ho ‘bashir’
kya hui shaan shan-e-goya.i
Leave a Reply