Husn Har Naunihaal Rakhta Hai

husn har naunihal rakhta hai

koi tujh sa jamal rakhta hai

mujh se ho tere jaur ka shikva

ye bhala ehtimal rakhta hai

tujh se kuchh apna arz-e-hal kare

dil kab itni majal rakhta hai

maah kya hai ki jis se duun tashbih

husn tu be-zaval rakhta hai

jite-ji us se ashiq-e-mahjur

kab umid-e-visal rakhta hai

tu kahan aur us ka vasl kahan

ye khayal-e-muhal rakhta hai

ji men ‘bedar’ tere milne ka

aah kya kya khayal rakhta hai

Leave a Comment