ham se kinara kyuun hai tire mubtala hain ham
ai bahr-e-husn aa idhar aa ashna hain ham
naqus mai-kade men bajaya to ye kaha
bande gunahgar tire ai khuda hain ham
parva nahin hai tum ko to hai tum pe kyuun maren
dubhar na zindagi hai na ghar se siva hain ham
ham se kisi ke ghamza-e-beja uthenge kya
nazuk-mizaj log hain ham mirza hain ham
ab kya banegi un se tabiat bigad gai
ab khush rahen vo jaan se apni khafa hain ham
Leave a Reply