Shakeel Haidar
ham ne vo dasht sanvara hai zamane ke liye
log aate hain jahan ḳhud ko miTane ke liye
ham-safar apni zarurat se ziyada na chale
raah chalti rahi iqrar nibhane ke liye
us ko aata hai siva rasm-e-juda.i ka hunar
dar khula chhoḌ gaya lauT kar aane ke liye
ham bhi hon ḳhak-nashinon ki rivayat ke amiin
chahe ik musht mile ḳhaak uḌane ke liye
har qadam saath rahi manzil-e-dil-shad magar
ku-ba-ku phirte rahe Thokaren khane ke liye
niind aa.e to koi bab-e-aziyyat hi khule
dastaki yaan hain bahut ḳhvab satane ke liye
bol ai gardish-e-ayyam kahan jaa.e ye dil
silsila kuchh to bane umr ganvane ke liye
dar-ba-dar hoti rahi apni ana kasa-ba-kaf
sar bhi ḳham hota raha qarz chukane ke liye
samna kar na saka apni haqiqat ka ‘shakil’
aa.ina toḌ diya ḳhud ko chhupane ke liye
Leave a Reply