Shafqat Tanveer Mirza
ham ne to yahi ma.arka maara hai safar men
manzil ki tarah baiTh ga.e rahguzar men
vo sham-e-shab-anjam ki surat to nahin tha
ik pal men shab-e-nisf utar aa.i hai ghar men
ai nala-e-dil-doz taḌap uTThi ḳhamoshi
hai marg-e-tamasha kisi abad nagar men
ham ḳhaak ke tuude pe khaḌe puchh rahe hain
kya lutf mila tum ko samundar ke safar men
ham saya-e-divar-e-shikasta men paḌe the
DhunDoge to paoge hamen saya-e-dar men
ye marhala-e-qat-e-ta.alluq to kaThin tha
ik dard ka dariya bhi hai ab dida-e-tar men
ik umr ke rishton ko fana pal men mili hai
ham DhunDne kya nikle hain sadiyon ke safar men
tarik-o-ḳhunuk ḳhaak ka paivand hue hain
ham tol ke laa.e the jinhen la.al-o-gohar men
yuun teri tarah duur ki manzil ke musafir
sab kuchh to nahin chhoḌ ke jaate kabhi ghar men
Leave a Reply