dil ko duniya se uTha.enge chale ja.enge
ḳhaak hasti ki uḌa.enge chale ja.enge
ye parinde jo munDeron pe khuli dhuup men hain
bal-o-par apne sukha.enge chale ja.enge
ik nazar dekh jab a.ina banaya hai hamen
ham tire hosh uḌa.enge chale ja.enge
jo kisi ko bhi samajh men nahin a.enge vahi
zindagi kya hai bata.enge chale ja.enge
ham to bas un ki angiThi ka bacha indhan hain
dil vo phir aa ke jala.enge chale ja.enge
mera ḳhaliq bhi to dekhe vo hai kaisa ḳhaliq
aa.ina us ko dikha.enge chale ja.enge
ai ḳhuda kya tiri duniya ko bana kar dozaḳh
apni jannat vo kama.enge chale ja.enge
hasrat-e-dad bhi ab dil men nahin hai ‘pinhan’
muft men sher suna.enge chale ja.enge
Leave a Reply