Ghulam Mohammad Qasir
ham ne to be-shumar bahane bana.e hain
kahta hai dil ki but bhi ḳhuda ne bana.e hain
le le ke tera naam in ankhon ne raat bhar
tasbih-e-intizar ke daane bana.e hain
ham ne tumhare gham ko haqiqat bana diya
tum ne hamare gham ke fasane bana.e hain
vo log mutma.in hain ki patthar hain un ke paas
ham ḳhush ki ham ne a.ina-ḳhane bana.e hain
bhanvre unhi pe chal ke karenge tavaf-e-gul
jo da.ere chaman men saba ne bana.e hain
ham to vahan pahunch nahin sakte tamam umr
ankhon ne itni duur Thikane bana.e hain
aaj us badan pe bhi nazar aa.e talab ke daagh
divar par bhi naqsh vafa ne bana.e hain
Leave a Reply