ham to yaan marte hain vaan us ko ḳhabar kuchh bhi nahin
ai vo sab kuchh hi sahi ishq magar kuchh bhi nahin
tum ko fariyad-e-sitam-kash ka ḳhatar kuchh bhi nahin
kuchh to ulfat ka asar hai ki asar kuchh bhi nahin
afiyat ek aur azar hazaron us men
jis ko kuchh suud nahin us ko zarar kuchh bhi nahin
ḳhalvat-e-raz men kya kaam hai hangame ka
hai ḳhabar-dar vahi jis ko ḳhabar kuchh bhi nahin
tu aur ik shaan ki aalam ki nazar men kya kuchh
main aur ik jaan ki phirte hi nazar kuchh bhi nahin
rahm hai us ka hi ashob-e-qayamat ki dalil
jis se bezar hai vo us ko ḳhatar kuchh bhi nahin
ham ko is hausle pe kyuun ki falak de saman
shikva-e-bar hai aur minnat-e-sar kuchh bhi nahin
rahi-e-mulk-e-adam hain nahin fikr-e-manzil
qasd rakhte hain udhar ka ki jidhar kuchh bhi nahin
ziist afsun-e-tamasha hai tavahhum ke liye
hoti hai jalva-numa misl-e-sharar kuchh bhi nahin
ḳhud-parasti ke sabab shaiḳh-o-barahman ko hai ḳhabt
sab idhar hi ki banavaT hai udhar kuchh bhi nahin
aqibat-bin ko hai har bazm ki shadi matam
sham.a roti hai ki hote hi sahar kuchh bhi nahin
roz-e-furqat ki darazi se na dekhe shab-e-hijr
hasrat-e-sham men tashvish-e-sahar kuchh bhi nahin
jante hain ki na bhaTkega jahan kya kya kuchh
dekhte hain ki unhen madd-e-nazar kuchh bhi nahin
ai ‘qalaq’ piite hi masjid men chale aate ho
be-ḳhabar kitne ho tum bhi ki ḳhabar kuchh bhi nahin
Leave a Reply