Hum To Majbur-E-Wafa Hain

tujh ko kitnon ka lahu chahiye ai arz-e-vatan

jo tire ariz-e-be-rang ko gulnar karen

kitni aahon se kaleja tira thanDa hoga

kitne aansu tire sahraon ko gulzar karen

tere aivanon men purze hue paiman kitne

kitne vaade jo na asuda-e-iqrar hue

kitni ankhon ko nazar kha gai bad-khvahon ki

khvab kitne tiri shah-rahon men sangsar hue

”bala-kashan-e-mohabbat pe jo hua so hua

jo mujh pe guzri mat us se kaho, hua so hua

mabada ho koi zalim tira gareban-gir

lahu ke daagh tu daman se dho, hua so hua”

ham to majbur-e-vafa hain magar ai jan-e-jahan

apne ushshaq se aise bhi koi karta hai

teri mahfil ko khuda rakkhe abad tak qaaem

ham to mehman hain ghadi bhar ke hamara kya hai

Leave a Comment