ambarin-salahuddin

Hum Sitaron Mein Tera Aks Na Dhalne Denge

ham sitaron men tira aks na Dhalne denge

chand ko shaam ki dahliz pe jalne denge

aaj chhu lenge koi arsh mire vahm-o-guman

khvab ko niind ki ankhon men machalne denge

ham bhi dekhenge kahan tak hai rasai apni

dil ko bahlaenge ham aur na sambhalne denge

shab ki aghosh men phailen na guman ke saae

ab nigahon men koi khauf na palne denge

ho na jaae kahin anjam se pahle anjam

is kahani ko isi taur se chalne denge

aks-dar-aks milenge tujhe manzar manzar

tu jo chahe bhi kahan tujh ko badalne denge

naqsh-dar-naqsh hue jaenge bas khaak yahin

khuud ko is dasht-e-guman se na nikalne denge

More Poems

Leave a Comment